白疯颠的早期图片 http://pf.39.net/bdfyy/bdfrczy/190210/6858103.html嘎讪胡
小寒，养一盆水仙花去
年末及小寒，
众花尚未开；
漳州水仙客，
窗前等春来。
坐勒电脑前头，头有点痛。昨日跑出去看电影，看仔天气预报出门的，讲是讲，最高温度有十二三度。不过，风头里还是蛮冷，郊区更加了，冷着了。窗外是樟树，四季常绿的，搿歇辰光终归有点泛*。风吹过，叶落声声。远处，屋顶上的天居然是青灰的，像水门汀一样又冷又硬；一直讲，要落雨，一直呒么落下来。要么，就是勒捂雪。捂雪天顶顶让人勿爽，窨丝丝，灰蒙蒙。倒勿如大雪纷飞，或者小雪飘飘，侪是通透的。树枝与天际之间，影影绰绰是灰鸽，三五成群，天气晴暖辰光，伊拉是懒洋洋勒地上觅食，人走过去，也笃笃定定，勿大睬人；就算车子过去，勿到伊身旁边，伊勿飞；而眼门前，倒是勒树影当中飞进飞出，勿晓得是受惊了，还是要寻地方迓起来。辰光就迭能，一寸一寸朝前，勿知勿觉，又一年小寒到了。小寒胜大寒，也是一年当中顶冷的日脚。搿歇辰光，有一桩闲事好做：到附近花市去兜一圈，水仙花球茎已经密密麻麻堆好了。勿会弄也呒么关系，寻个热心的老板，帮侬拣几棵，再叫伊帮侬处理一下，拿只球茎削一削，挖一挖。搿种技术，侬勿学也罢。自家勿会的事体，交拨专家去弄，多少好。养起来也便当。备一只青花盆，勿浅勿深顶好；盆底放一层水，再寻几粒鹅卵石，勒水仙旁边凑凑趣；水仙球茎直接摆进去就好，有空辰光调调水，晒晒太阳，伊自顾自会生根长叶，等到花开满枝的辰光，春天也就到了。从前辰光，看到自家养的水仙，绿叶疯长，七歪八倒，花倒是呒么开几朵，也会纠结。现在想想，也呒啥啥。世间万物，讲穿了，本来也呒啥好坏，差别只是心情。更何况，总有几朵小花，会为侬踏春而来。
迓起来：躲起来。
沪语注释
沈一珠
